Vrasja barbare e shqiptarit në burg: Autori e qëlloi edhe para gardianëve

Një shqiptar u vra në burgun e Koridalosit në Greqi. Bëhet fjalë për Albert Bakun, një person i njohur për krimet e tij në Greqi. Ai kishte plagosur 14 persona në një lokal në Pire në vitin 2014.

Jo vetëm kaq, Baku dyshohet se qëndronte pas tentativës për vrasjen e avokatit Antonopulos dhe se mund të kishte porositur vrasjen e avokatit Mikalis Zafiropulos.

Informacionet e para tregojnë se i burgosuri shqiptar ishte transferuar së fundmi në burgun Koridalos në pritje të nisjes së gjykimit për vrasjen e Zafiropulos.

Disa media greke thonë se ekzekutori i tij është një tjetër shqiptar, pikërisht i akuzuari për vrasjen e avokatit Zafiropulos. Sulmi ndaj tij erdhi brenda në qeli. Më pas shqiptari i plagosur doli jashtë duke kërkuar ndihmë, por nuk i shpëtoi vdekjes. Madje autori thuhet se e qëlloi Bakun edhe para gardianëve, kurse këta të fundit mundoheshin t’ia hiqnin nga duart.

Autori mendohet se është një rom 32-vjeçar nga Shqipëria, i dënuar për disa krime, mes tyre sulme të përgjakshme, grabitje dhe përdhunime.

Mediat thonë se ekzistojnë pamje filmike të momentit të ngjarjes. Ministria e Drejtësisë ka nisur një hetim. Kjo për shkak se vrasja duket e organizuar dhe jo një krim spontan. Qelia e tij ishte e hapur, edhe pse rregullorja kërkonte që ajo të ishte e mbyllur.

Baku, 36-vjeçar, kishte shprehur frikë për jetën, megjithatë askush nuk ishte shqetësuar, duke e transferuar në një burg ku bandat e shqiptarëve kanë kryer së paku 12 krime brenda qelive.

Viktima shqiptare ishte i njohur në botën e krimit në Greqi. Kur kishte hyrë në burg herët e shkuara, kishte tentuar të krijonte grupe të udhëhequra prej tij, prandaj e kishin transferuar.

Baku ishte pjesë e një grupimi nacionalist me rreth 145 mijë anëtarë në Facebook, të cilët kishin si moto të tyren hakmarrjen ndaj Greqisë për vrasjen Ilia Karelit në burgun e Nigritas.

Në këtë faqe me profil nacionalist shfaqeshin grupime të armatosura, të cilat promovonin Shqipërinë Etnike dhe shprehin revoltën e tyre për policinë greke.

Shkruar Nga
More from Enton Palushi

Dhuna shtetërore, mohimi dhe trashëgimitë traumatike të komunizmit

Nga Lori E. Amy Në vitin 2009, kur unë fillova të flisja...
Read More